कोरेगाव भिमा : गजानन गव्हाणे पाटील
हवेली तालुक्यातील लोणीकंद ग्रामपंचायतीच्या सरपंच पदासाठी झालेल्या निवड प्रक्रियेत सुप्रिया जय कंद यांची बिनविरोध निवड करण्यात आली.
लोणीकंद सरपंचपदाचे आरक्षण इतर मागास प्रवर्ग (महिला) असे आहे. सरपंच मोनिका कंद यांनी राजीनामा दिल्याने हे पद रिक्त झाले होते. त्यानंतर झालेल्या निवड प्रक्रियेत सुप्रिया कंद यांचा एकमेव उमेदवारी अर्ज आल्यामुळे निवडणूक निर्णय अधिकारी संदीप झिंगाटे यांच्या अध्यक्षतेखाली झालेल्या बैठकीत त्यांची बिनविरोध निवड जाहीर करण्यात आली.
निवडीनंतर ग्रामस्थांच्या वतीने सुप्रिया कंद यांचा शाल, श्रीफळ व पुष्पहार देऊन सत्कार करण्यात आला. याप्रसंगी जिल्हा परिषद सदस्य किरण साकोरे, हवेली पंचायत समिती सदस्य मोनिका कंद, राणी वाळके, कृषी उत्पन्न बाजार समितीचे माजी उपसभापती नारायण कंद, रविंद्र कंद, माजी जिल्हा परिषद सदस्य शंकर भूमकर, जिल्हा क्रीडा अध्यक्ष भाजपा संदीप आप्पा भोंडवे, तंटामुक्ती समितीचे अध्यक्ष संजय कंद, माजी सरपंच श्रीकांत कंद, अनिल होले, जनार्धन वाळुंज, गंगाधर दळवी, बाळासाहेब मोरे, गजानन कंद, गुलाब कंद, गणेश जगताप यांच्यासह ग्रामपंचायत सदस्य, आजी-माजी पदाधिकारी, ग्रामविकास अधिकारी जालिंदर बोरावणे, ग्राम महसूल अधिकारी अभिजित जोशी आदी ग्रामस्थ मोठ्या संख्येने उपस्थित होते.
नवनिर्वाचित सरपंच सुप्रिया कंद म्हणाल्या की, पुणे जिल्हा परिषदेचे माजी अध्यक्ष तथा पीडीसीसी बँकेचे विद्यमान संचालक प्रदीपदादा कंद, कृषी उत्पन्न बाजार समितीचे माजी सभापती नारायणराव कंद तसेच लोणीकंदमधील ज्येष्ठ ग्रामस्थ यांच्या सहकार्यामुळे मला सरपंच पदाची जबाबदारी मिळाली. त्याबद्दल मी संपूर्ण गावाची ऋणी आहे. भविष्यात प्रदीपदादांनी पाहिलेल्या स्वप्नातील लोणीकंद घडविण्यासाठी मी कटीबद्ध राहीन. लोणीकंद ग्रामपंचायतीच्या माध्यमातून गावाचा सर्वांगीण विकास करणे, महिला व युवकांना संधी उपलब्ध करून देणे तसेच शासकीय योजनांचा लाभ प्रत्येक घरापर्यंत पोहोचवणे हे माझे प्रमुख ध्येय असेल, असे त्यांनी माध्यमांशी बोलताना सांगितले.
त्यांच्या या निवडीचे लोणीकंद गावासह परिसरात स्वागत होत आहे.
